Aurtengo edizioa

2026. urtean itzuli gara mendiarekin bat egitera, oraingoan 28. edizioa egin eta ospatzeko. Aurten ekainaren 1eko igandean egingo dugu, Iñaki Beitiaren Omenezko Mendi Martxa berriz ospatuko dugu. Ohi bezala, Ibilaldia Goierri, Deba Garaia eta Urola Kosta eskualdeetatik igarotzen da, eta aukera bikaina da paraje eder horiek ezagutzeko eta gozatzeko. Azken edizioetan bezala, ibilbide bakarra egingo da, aurten 30 kilometro izango ditu eta 1.800 metroko desnibela metatuko da.

Areizaga-Kalebarren enparantzatik abiatuko gara eta Zumarraga aldera eginez, Eitza auzorantzako Elizkale kalea hartuko dugu. Intxausti baserriaren ondoko bide pikoa hartuko dugu Antio baselizara iristearren. Elorriaga baserriaren gaineko pista hartu eta Beloki gainerako bidegurutzera iritsiz, aldapan behera gero, Elorriaga lepora jaitsiko gara.

Udako txabola aldera igoko gara Elorriaga lepotik eta haren gainetik eskuinalderantz atera den pista jarraituko dugu. Izazpi magaletik igaroko gara tarte batean, altuerarik ia aldatu gabe. Mutxigegi parajera iritsiko gara. Hesiaren beste aldera pasa eta aldapa pikoan, Izazpi gainera igoko gara (1. kontrola).

Gurutze berritik kordaletik jarraituko dugu eta gurutze zaharraren ondotik igaroko gara (Anjel Etxeberriaren monolitoa ere bertan da), eta kordala jarraituz Pagotxoetara iritsiko gara (1. anoa-postua). Pagola, Pagobakarra parajeak eta Samiño tontorrera igoko gara zuzen. (2. kontrola).

Oleta aldera jaitsiko gara eta bidean, Oñamendi tontorretik igaroko gara (Iñaki Beitiaren omenezko txartel-ontzia bertan). Oleta lepotik Aizpurutxo aldera jaisten den pistatik jarraituko dugu. Ibargoiti tontortxopeko Dantzaleku lepotik igaro eta Ula baserrirako pista hartuko dugu, aurretik basoan zehar diren zidorretatik igaroz. Ule baserritik, Aizpurutxo auzora jaitsiko gara. Bertan izango dugu 2. anoa-postua eta 3. kontrola.

Aizpurutxon, errepidea zeharkatu eta Bergaraetxeberribekoa baserriaren azpitik igaroko gara, garaiera ia irabazi gabean. Handik Pikunieta baserriaren ondotik igaroko gara eta Osinbeltz parajetik igaroz, Trekutz leporaino iritsiko gara (3. anoa-postua). Zazpi Puntak eta Irimotik igaro ondoren (4. kontrola). Lizarriturrira jaitsiko gara eta bertatik, zidor zaharretik jaitsi ondoren, Ipeñarrieta jauregiaren gainetik jarraituko dugu, hura jarraituz Etxaburura jaitsiz. Larreaga baserritik igaroz, Urretxuko eliza eta plazara jaitsiko gara eta handik azkenean, Areizaga-Kalebarren enparantzara (4. anoa-postua eta 5. kontrola).

• Kontrolak: Areizaga/Kalebarren plaza (hasierako kontrola -txartela zigilatuta emango da), Izazpi, Samiño, Aizpurutxo, Irimo eta Areizaga/Kalebarren plaza (itxiera-kontrola).

• Anoa-postuak: Pagotxoeta, Aizpurutxo, Trekutz eta Areizaga/Kalebarren plaza.

Segurtasuna

Ibilbidearen segurtasunari dagokionez, Gurutze Gorriaren laguntza dugu. Izan ere, lur orotako ibilgailu bat erabiltzen da hainbat kontrolgunetan zehar mugitzeko, esku hartu behar bada ere. Unitate mugikor hori eta kontrol-puntu guztiak, telefono mugikorren bidez egongo dira harremanetan erakundeko postu nagusiarekin. Kontrol guztietan, ibilgailu batzuk eskuragarri egongo dira parte-hartzaileren bat ebakuatu behar bada.

Berrikuntzak

• Edizio honetan Oñamendi gailurreko postontzia berriz bisitatzeko aukera izango dugu: Iñaki hil zeneko 25. urteurrenean inauguratu zen. Era berean, Aizpurutxora Dantzalekutik eta Ula baserritik jaitsiko gara eta Santa Barbaratik, Ipeñarrieta gaineko pista batetik jarraituko dugu Etxaburu iritsi arte eta Larreaga baserritik Urretxu erdiguneraino jaitsiko gara.

Zerbitzuak

• Aparkaleku berezia. Urretxu eta Zumarragako Udalen kolaborazioarekin, kanpotik datozenek Beitia Mendi Martxarentzako espresuki jarritako aparkaleku bereziak izango dituzte, bat Urretxuko Lizeoan -helmugatik oso hurbil- eta bigarrena Zumarragako La Salle Ikastetxeko patioan -helmugatik 5 minutuko bidean-, goizeko ordu horietan, autoa aparkatzen denborarik gal ez dezaten. Informazio guztia Nola etorri izeneko atalean duzu.